ਕਪੂਰਥਲਾ ਦੇ ਪਿੰਡ 'ਚ 'ਬੀਮੇ ਦੇ ਪੈਸੇ' ਲਈ ਅਮਰੀਕੀ ਔਰਤ ਦਾ ਸਹੁਰਿਆਂ ਨੇ ਕੀਤਾ ਕਤਲ

ਪੰਜ ਸਾਲਾ ਲੜਕੇ ਦੀ ਮਾਂ ਅਮਰੀਕਾ ਦੀ ਨਾਗਰਿਕ ਸੀ ਅਤੇ ਪੁਲਿਸ ਨੇ ਦਾਅਵਾ ਕੀਤਾ ਕਿ ਉਸ ਨੂੰ ਉਸ ਦੇ ਬੀਮੇ ਦੇ ਪੈਸੇ ਲਈ ਕਤਲ ਕੀਤਾ ਗਿਆ। ਸਹੁਰੇ ਅਤੇ ਪਤੀ ਖ਼ਿਲਾਫ਼ ਐਫਆਈਆਰ ਦਰਜ।

ਅਮਰੀਕਾ ਵਿੱਚ ਰਹਿੰਦੀ ਰਾਜਦੀਪ ਕੌਰ ਦਾ ਸਹੁਰਿਆਂ ਵੱਲੋਂ ਕਥਿਤ ਤੌਰ ’ਤੇ ਕਤਲ ਕਰ ਦਿੱਤਾ ਗਿਆ / ਸੋਸ਼ਲ ਮੀਡੀਆ

ਕਪੂਰਥਲਾ ਦੇ ਇੱਕ ਪਿੰਡ ਵਿੱਚ ਅਮਰੀਕਾ ਵਿੱਚ ਰਹਿੰਦੀ ਇੱਕ ਔਰਤ ਰਾਜਦੀਪ ਕੌਰ (32) ਨੂੰ ਰਿਸ਼ਤੇਦਾਰ ਦੇ ਵਿਆਹ ਦੇ ਬਹਾਨੇ ਭਾਰਤ ਬੁਲਾਏ ਜਾਣ ਤੋਂ ਬਾਅਦ ਉਸ ਦੇ ਸਹੁਰਿਆਂ ਵੱਲੋਂ ਕਥਿਤ ਤੌਰ ’ਤੇ ਕਤਲ ਕਰ ਦਿੱਤਾ ਗਿਆ।

ਪੰਜ ਸਾਲਾ ਲੜਕੇ ਦੀ ਮਾਂ ਅਮਰੀਕਾ ਦੀ ਨਾਗਰਿਕ ਸੀ ਅਤੇ ਪੁਲਿਸ ਨੇ ਦਾਅਵਾ ਕੀਤਾ ਕਿ ਉਸ ਨੂੰ ਉਸ ਦੇ ਬੀਮੇ ਦੇ ਪੈਸੇ ਲਈ ਕਤਲ ਕੀਤਾ ਗਿਆ ਸੀ।

ਸੁਲਤਾਨਪੁਰ ਲੋਧੀ ਦੇ ਡੀਐਸਪੀ ਬਬਨਦੀਪ ਸਿੰਘ ਨੇ ਕਿਹਾ, "ਇਹ ਮੰਨਿਆ ਜਾ ਰਿਹਾ ਹੈ ਕਿ ਔਰਤ ਦਾ ਕਤਲ ਇਸ ਲਈ ਕੀਤਾ ਗਿਆ ਸੀ ਕਿਉਂਕਿ ਉਸ ਕੋਲ ਇੱਕ ਵੱਡੀ ਜੀਵਨ ਬੀਮਾ ਕਵਰੇਜ ਸੀ।" ਉਸ ਦੀ ਸੱਸ ਦਲਜੀਤ ਕੌਰ ਅਤੇ ਸਹੁਰੇ ਜਗਦੇਵ ਸਿੰਘ ਨੂੰ ਅੱਜ ਸਵੇਰੇ ਪੁਲੀਸ ਨੇ ਗ੍ਰਿਫ਼ਤਾਰ ਕਰ ਲਿਆ ਹੈ। ਉਸ ਦੇ ਪਤੀ ਮਨਜਿੰਦਰ ਸਿੰਘ, ਜੋ ਕਿ ਅਮਰੀਕਾ ਵਿੱਚ ਹੈ, ਖ਼ਿਲਾਫ਼ ਕੇਸ ਦਰਜ ਕੀਤਾ ਗਿਆ ਹੈ।

ਕਪੂਰਥਲਾ ਦੇ ਪਿੰਡ ਨੈਨੋ ਮੱਲੀਆਂ ਵਿਖੇ 19 ਅਤੇ 20 ਜਨਵਰੀ ਦੀ ਦਰਮਿਆਨੀ ਰਾਤ ਨੂੰ ਰਾਜਦੀਪ ਕੌਰ ਦਾ ਕਤਲ ਕਰ ਦਿੱਤਾ ਗਿਆ। ਪਤੀ ਦੇ ਕਹਿਣ 'ਤੇ ਉਹ 12 ਜਨਵਰੀ ਨੂੰ ਆਪਣੇ ਪੰਜ ਸਾਲਾ ਬੇਟੇ ਨਾਲ ਕਪੂਰਥਲਾ ਆਈ ਸੀ। ਜਦੋਂ ਕਿ ਉਸ ਕੋਲ ਅਮਰੀਕੀ ਨਾਗਰਿਕਤਾ ਸੀ, ਉਸ ਦਾ ਪਤੀ ਅਮਰੀਕਾ ਵਿਚ ਗੈਰ-ਕਾਨੂੰਨੀ ਤੌਰ 'ਤੇ ਰਹਿ ਰਿਹਾ ਹੈ ਅਤੇ ਗ੍ਰੀਨ ਕਾਰਡ ਲੈਣ ਦੀ ਕੋਸ਼ਿਸ਼ ਕਰ ਰਿਹਾ ਹੈ।

ਦੋ ਦਿਨਾਂ ਤੱਕ ਉਸ ਦੇ ਸਹੁਰੇ ਪਰਿਵਾਰ ਨੇ ਲਾਸ਼ ਨੂੰ ਪਿੰਡ ਸਿੱਧਵਾਂ ਦੋਨਾ ਵਿਖੇ ਫਰੀਜ਼ਰ ਵਿੱਚ ਰੱਖਿਆ ਅਤੇ ਸੁਲਤਾਨਪੁਰ ਲੋਧੀ ਪੁਲਿਸ ਨੂੰ ਸੂਚਨਾ ਦਿੱਤੀ। ਪੁਲੀਸ ਨੇ 23 ਜਨਵਰੀ ਨੂੰ ਲਾਸ਼ ਨੂੰ ਪੋਸਟਮਾਰਟਮ ਲਈ ਕਬਜ਼ੇ ਵਿੱਚ ਲੈ ਲਿਆ।

ਇਸ ਦੌਰਾਨ, ਰਾਜਦੀਪ ਦੇ ਯੂਕੇ-ਅਧਾਰਤ ਮਾਪਿਆਂ ਨੂੰ ਆਪਣੀ ਧੀ ਦੀ ਮੌਤ ਬਾਰੇ ਟੈਲੀਫੋਨ ਰਾਹੀਂ ਜਾਣਕਾਰੀ ਮਿਲੀ। ਰਾਜਦੀਪ ਦਾ ਕਤਲ ਹੋਣ ਦੇ ਸ਼ੱਕ ਵੱਜੋਂ ਉਸਦੀ ਮਾਂ ਨਿਰਮਲ ਕੌਰ ਭਾਰਤ ਆ ਗਈ ਅਤੇ 25 ਜਨਵਰੀ ਨੂੰ ਸੁਲਤਾਨਪੁਰ ਲੋਧੀ ਪੁਲਿਸ ਨੂੰ ਸ਼ਿਕਾਇਤ ਕੀਤੀ।

ਰਾਜਦੀਪ ਦੇ ਰਿਸ਼ਤੇਦਾਰਾਂ ਨੇ 27 ਜਨਵਰੀ ਨੂੰ ਸੁਲਤਾਨਪੁਰ ਲੋਧੀ ਥਾਣੇ ਵਿੱਚ ਵਿਰੋਧ ਪ੍ਰਦਰਸ਼ਨ ਕੀਤਾ ਸੀ ਜਿਸ ਤੋਂ ਬਾਅਦ ਐਫਆਈਆਰ ਦਰਜ ਕੀਤੀ ਗਈ ਸੀ।

ਨਿਰਮਲ ਕੌਰ ਨੇ ਕਿਹਾ, “ਰਾਜਦੀਪ ਨੂੰ ਉਸਦੇ ਪਤੀ ਦੁਆਰਾ ਲਗਾਤਾਰ ਤਸੀਹੇ ਦਿੱਤੇ ਜਾਂਦੇ ਸਨ। ਉਹ ਚਾਹੁੰਦਾ ਸੀ ਕਿ ਉਹ ਆਪਣੀ ਸਾਰੀ ਜਾਇਦਾਦ ਉਸ ਦੇ ਨਾਂ ਕਰ ਦੇਵੇ ਤਾਂ ਜੋ ਉਸ ਨੂੰ ਗ੍ਰੀਨ ਕਾਰਡ ਮਿਲ ਸਕੇ। ਮੇਰੀ ਬੇਟੀ ਨੂੰ ਵਿਆਹ ਦਾ ਕਹਿ ਕੇ ਝੂਠ ਦੇ ਆਧਾਰ 'ਤੇ ਭਾਰਤ ਬੁਲਾਇਆ ਗਿਆ ਸੀ। ਇਹ ਉਸ ਨੂੰ ਮਾਰਨ ਦੀ ਯੋਜਨਾ ਸੀ। ਉਸ ਦੇ ਪਤੀ ਮਨਜਿੰਦਰ ਨੇ ਸਾਨੂੰ ਦੱਸਿਆ ਕਿ ਉਸ ਦੀ ਦਿਲ ਦਾ ਦੌਰਾ ਪੈਣ ਕਾਰਨ ਮੌਤ ਹੋ ਗਈ। ਇਕ ਹੋਰ ਰਿਸ਼ਤੇਦਾਰ ਨੇ ਦੱਸਿਆ ਸੀ ਕਿ ਉਸ ਦੀ ਮੌਤ ਕਮਰੇ ਦੇ ਹੀਟਰ ਦੀ ਗੈਸ ਕਾਰਨ ਹੋਈ ਹੈ।

ਪੁਲਿਸ ਨੇ ਦੱਸਿਆ, “ਰਾਜਦੀਪ ਨੂੰ ਮਨਜਿੰਦਰ ਦੀ ਮਾਸੀ ਦੇ ਲੜਕੇ ਦੇ ਵਿਆਹ ਦੇ ਬਹਾਨੇ ਕਪੂਰਥਲਾ ਬੁਲਾਇਆ ਗਿਆ ਸੀ। ਪਰ ਕੋਈ ਵਿਆਹ ਨਹੀਂ ਹੋਇਆ।''

ਪੁਲਿਸ ਨੇ ਕਿਹਾ, ''ਔਰਤ ਦੀ ਮੌਤ ਦਮ ਘੁੱਟਣ ਕਾਰਨ ਹੋਈ ਹੈ, ਜਿਸ ਤੋਂ ਪਤਾ ਲੱਗਦਾ ਹੈ ਕਿ ਉਸ ਦਾ ਕਤਲ ਕੀਤਾ ਗਿਆ ਹੈ। ਜਿਸ ਦਿਨ (ਸ਼ਨੀਵਾਰ) ਪੋਸਟਮਾਰਟਮ ਦੀ ਰਿਪੋਰਟ ਆਈ ਸੀ, ਉਸੇ ਦਿਨ ਸਹੁਰੇ ਅਤੇ ਪਤੀ ਖ਼ਿਲਾਫ਼ ਐਫਆਈਆਰ ਦਰਜ ਕੀਤੀ ਗਈ ਸੀ।